ಉಡುಪಿ: ಭಾರತದ ಸುಪ್ರಸಿದ್ಧ ಮತ್ತು 77 ವರ್ಷಗಳ ಭಕ್ತಿ ಹಾಗೂ ಸುಗಂಧ ಪರಂಪರೆ ಹೊಂದಿರುವ ಸೈಕಲ್ ಪ್ಯೂರ್ ಅಗರಬತ್ತಿ ಸಂಸ್ಥೆಯು, ಹನುಮ ಜಯಂತಿಯ ಶುಭ ಸಂದರ್ಭಕ್ಕಾಗಿ ಸಿದ್ಧಪಡಿಸಿದ ‘ಹನುಮಾನ್ ಚಾಲೀಸಾ’ ದ ಗ್ರಂಥ ಮಾದರಿಯ ಸಾಂಪ್ರದಾಯಿಕ ಕಿರುಹೊತ್ತಗೆ ಹಾಗೂ ಧ್ವನಿ ಸುರುಳಿಯನ್ನು ಉಡುಪಿಯ ಶ್ರೀ ಪುತ್ತಿಗೆ ಮಠದ ಪೀಠಾಧೀಶರಾದ ಪರಮಪೂಜ್ಯ ಜಗದ್ಗುರು ಶ್ರೀ ಶ್ರೀ ಸುಗುಣೇಂದ್ರ ತೀರ್ಥ ಸ್ವಾಮೀಜಿಯವರು ಲೋಕಾರ್ಪಣೆಗೊಳಿಸಿದರು.
ಗೀತಾಮಂದಿರದ ಲಡ್ಡುಕೃಷ್ಣ ಸಾನಿಧ್ಯದಲ್ಲಿ , ಶ್ರೀಪಾದರ ದಿವ್ಯೋಪಸ್ಥಿತಿಯೊ0ದಿಗೆ, ಧ್ವನಿಸುರುಳಿಗೆ ಕಂಠದಾನ ಮಾಡಿದ ಶ್ರೀಮಠದ ವಿದ್ವಾಂಸರಾದ ವಿದ್ವಾನ್ ಕೆ.ವಿ. ರಮಣ್ ಆಚಾರ್ಯ ಹಾಗೂ ವಿದುಷಿ ಅಯನಾ ವಿ. ರಮಣ್ ಹನುಮಾನ್ ಚಾಲೀಸವನ್ನು ಸುಶ್ರಾವ್ಯವಾಗಿ ಪಠಿಸಿದರು.
ಆಶೀರ್ವಚನ ನೀಡಿದ ಶ್ರೀಪಾದರು, ಸಾಂಪ್ರದಾಯಿಕ ದಾರ ಮತ್ತು ಮಣಿಯಿಂದ ಸುಂದರವಾಗಿ ಅಲಂಕರಿಸಲ್ಪಟ್ಟಿರುವ ಈ ಪ್ರಾರ್ಥನಾ ಪುಸ್ತಕವು ಭಕ್ತಿ, ನಂಬಿಕೆ ಮತ್ತು ದೈವಿಕ ರಕ್ಷಣೆಯ ನಿರಂತರ ಒಡನಾಡಿಯಾಗಿದೆ. ಪ್ರತಿ ನಿತ್ಯ ಹನುಮಾನ್ ಚಾಲೀಸಾದ ಪಠಣದ ಮೂಲಕ ಈ ಬಾರಿಯ ಹನುಮ ಜಯಂತಿಯು ಹನುಮ, ರಾಮ ಹಾಗೂ ಕೃಷ್ಣ ಭಕ್ತರಿಗೆ, ಅಷ್ಟೇ ಅಲ್ಲದೆ ಸಮಸ್ತ ಆಸ್ತಿಕ ಲೋಕಕ್ಕೆ ಒಂದು ಮಹತ್ವದ ಕೊಡುಗೆಯಾಗಿದೆ ಎಂದು ಹರಸಿದರು.
ಭಕ್ತರು ಮತ್ತು ಆಸಕ್ತರ ಅನುಕೂಲಕ್ಕಾಗಿ ಈ ಹನುಮಾನ್ ಚಾಲೀಸಾವನ್ನು ಕೇಳಲು ಮತ್ತು ಓದಲು ಯೂಟ್ಯೂಬ್ ಸೇರಿದಂತೆ ವಿವಿಧ ಆನ್ಲೈನ್ ವೇದಿಕೆಗಳಲ್ಲಿ ಲಭ್ಯವಾಗುವಂತೆ ಮಾಡಲಾಗಿದೆ.
ಮೈಸೂರಿನ ಎನ್. ರಂಗರಾವ್ ಅಂಡ್ ಸನ್ಸ್ ಪ್ರೈವೇಟ್ ಲಿಮಿಟೆಡ್ ಸಂಸ್ಥೆಯು ಈ ವಿಶೇಷ ಭಕ್ತಿ ಕಾಣಿಕೆಯನ್ನು ನಿರ್ಮಾಣ ಮಾಡಿ ಸಮಾಜಕ್ಕೆ ಅರ್ಪಿಸಿದೆ.
ಪುಸ್ತಕದ ವಿಶೇಷತೆಗಳು:
ವಿನ್ಯಾಸ: ಈ ಹನುಮಾನ್ ಚಾಲೀಸಾ ಹನುಮದ್ ಭಕ್ತರಿಗಾಗಿ ವಿಶೇಷವಾಗಿ ವಿನ್ಯಾಸಗೊಳಿಸಲಾದ ಪುಸ್ತಕವಾಗಿದ್ದು, ಪವಿತ್ರ ಶ್ಲೋಕಗಳನ್ನು ಸಾಂಪ್ರದಾಯಿಕ ತಾಳೆಗರಿಯ ಶೈಲಿಯಲ್ಲಿ ವಿನ್ಯಾಸಗೊಳಿಸಲಾಗಿದೆ.
ಬಾಳಿಕೆ: ದೀರ್ಘಕಾಲ ಬಾಳಿಕೆ ಬರುವಂತೆ ಮತ್ತು ಹರಿಯದ ಹಾಳೆಗಳಲ್ಲಿ ಶಾಶ್ವತವಾಗಿ ಇರುವಂತೆ ಮುದ್ರಿಸಲಾಗಿದೆ.
ಲಿಪಿಗಳು: ಸುಲಭವಾದ ಪಠಣಕ್ಕೆ ಅನುಕೂಲವಾಗುವಂತೆ ಕನ್ನಡ, ತೆಲುಗು, ಹಿಂದಿ ಮತ್ತು ಇಂಗ್ಲಿಷ್ ಲಿಪಿಗಳಲ್ಲಿ ಹನುಮಾನ್ ಚಾಲೀಸಾವನ್ನು ನೀಡಲಾಗಿದೆ.
ಧ್ವನಿ ಸುರುಳಿ: ಓದುವಿಕೆ ಮತ್ತು ಪಾರಾಯಣಕ್ಕೆ ಅನುಕೂಲವಾಗುವಂತೆ ಪುರುಷ ಮತ್ತು ಮಹಿಳಾ ಧ್ವನಿಗಳಲ್ಲಿ (ವಿದ್ವಾನ್ ಕೆ.ವಿ. ರಮಣ್ ಆಚಾರ್ಯ ಮತ್ತು ವಿದುಷಿ ಅಯನಾ ವಿ. ರಮಣ್) ಸುಶ್ರಾವ್ಯವಾಗಿ ಮೂಡಿಬರುವಂತೆ ಸಂಯೋಜಿಸಲಾಗಿದೆ.
ಡಿಜಿಟಲ್ ಸೌಲಭ್ಯ: ಈ ಹೊತ್ತಗೆಯಲ್ಲಿ ಕ್ಯೂಆರ್ ಕೋಡ್ (QR Code) ಅಳವಡಿಸಲಾಗಿದ್ದು, ಅದರ ಮೂಲಕ ಧ್ವನಿ ಸುರುಳಿಯನ್ನು ಕೇಳುವ ಸೌಕರ್ಯವಿದೆ.
